政壇：阿忠再請工黨食檸檬

區選影響政局，連由勞工界立法會議員同啲理念近似者想搞嘅工黨都面臨變數，據知，原本有人諗住職工盟立法會議員李卓人贏咗區選後，可以代表工黨出戰明年立法會超級區議會議席，點知阿人最後輸咗，如意算盤再打唔響。區選過後，阿人同社福界立會議員張國柱兩大工黨支柱，曾經再搵攞到超級區會入場券嘅街工梁耀忠過檔，可惜阿忠第二次畀大檸檬工黨食，講到明唔使諗。

從政近廿年都從未選過區議會嘅阿人，畀工聯會小花劉桂容擊敗，成為「氹仔浸死蛟龍」嘅人辦，打亂咗工黨嘅部署。

早喺區選前，工黨已力說街工同佢哋嘅靈魂人物阿忠加盟，不過對方覺得街工同工黨好難分清楚角色，到底係邊個話事，一直傾唔掂數，所以街工早前已正式投票通過唔會加入工黨，連阿忠以個人名義加入都唔得。

街工喺新界西、尤其喺葵青區有雄厚地區實力，喺地區選舉好穩陣，去選超級區會卻變數多多，所以佢都係打算留喺新界做「山寨王」好過，以個人身份支持工黨嘅活動。