政壇：搞搞政：官商一家親

投票選特首嘅選舉委員會界別分組選舉提名尋日進入第二日，麗新發展主席林建岳拉埋譚詠麟、黎明等十五個演藝界人士，聯合報名參加演藝小組選委，林建岳呢個動作引嚟唔少關注。

張名單主要由香港影業協會、唱片協會、戲院商會及九大電影工作者協會組成，已包攬八、九成選票，而名單內其中十個成員仲係上屆選委，連名單成員之一，香港影業協會理事長洪祖星都話，「其他人企出嚟（參選選委）都無咩用」，對當選相當有把握，仲話應該可以自動當選。

唐唐親弟參選選委

林建岳同特首選舉疑似候選人唐英年關係千絲萬縷，之前唐唐做財政司司長，林建岳曾經用私人飛機送唐唐出席國際影展，如果唐唐經佢支持後做埋特首，關係一定更加密切，點止一齊搭飛機呀！不過，林建岳尋日去遞交提名表時竟然否認挺唐，話一切要睇過特首參選人政綱先決定，又話自己報名參加選委只係盡公民責任喎。

至於唐英年嘅親弟唐慶年原來前日已循進出口界提名參選選委，佢報稱商人，並無政治聯繫。