政壇：IQ博士交行貨博玩多屆

區選落幕，政界嘅目標已經迅速轉向明年嘅立法會選舉，新一屆立法會席位多咗，競爭更加「超級」激烈，本地老牌親中商會中總早前有內部消息傳出，明年可能另選立法會代表，當時所講嘅一大主因就係現任代表、有IQ博士之稱嘅黃宜弘太冇表現，更有監察團體視其為「議會懶蛇」之一，近日又有傳IQ博士唔願走，想力拚多一屆，尋日佢更放下慵懶姿態，提出動議辯論挽救形象，可惜補鑊之作好行貨呢！

IQ博士不時畀人話懶，開會時「釣魚」好平常，提出嘅辯論同質詢更少之又少，有監察團體覆核議員一年一度嘅表現時，都發現佢嘅會議出席率麻麻，議員工作其中一項指標、提動議同質詢都喺平均之下，早前政圈就傳出，中華總商會副會長方文雄想踢走IQ博士，取代佢做中總嘅立法會代表。

話要應對經濟波動

唔知係咪要趕走敵人，做多一屆議員，一向唔多郁嘅IQ博士都要改變形象向選民交功課，尋日罕有咁喺大會提出關於經濟民生嘅動議辯論，話要協助市民應對經濟波動。但睇真啲，同上星期建仔劉江華提出嘅「減輕中產人士經濟負擔」熟口熟面。IQ博士係咪趕時間交行貨呢﹖

由於個動議同一個禮拜前太相似，尋日因應議案發言嘅議員並唔多，畀面講幾句嘅人，內容又同上星期如出一轍，議員官員更冇喺動議辯論擦出火花，最認真嗰個可能係IQ博士，少有無瞓覺之餘，仲全程聽足議員講嘢，不時點頭回應交足戲，負責回應嘅官員財經事務及庫務局局長陳家強卻唔想陪佢做戲，草草講幾句就算數。