政壇：區選臨頭各自飛 工商專聯冇影

由富貴黨、經濟動力同專業會議等人成立嘅工商專業聯盟，早排成立時浩浩蕩蕩，聲勢之大一時無兩，但前日區議會選舉，各黨都係自己顧自己，用番自己牌頭出戰，聯盟好似冇乜動靜，就連包括召集人Jeffrey林健鋒在內嘅多名核心成員都唔見影。唔通佢哋翹埋手隔岸觀火？咁仲係聯盟？

工商專聯一共有十二位立法會議員，但係今次冇一個候選人係用呢個牌頭出戰，Jeffrey話早已有共識，大家用番自己個黨同組織去選，但係拉票就一齊拉，只要係聯盟入面嘅人，都會拉票。佢又話至緊要贏到議席，大家用乜名出選，唔係最緊要。

最快下年浮面參選

佢話，好似前日選舉咁，經濟動力本身都有三人出戰，雖然最尾得一人跑出，但佢話自己成日周圍走，幫黨友助選到夜晚十二點至收工，而其他本身係工商專聯嘅候選人，佢都有出面拉票，只不過唔係焦點選區，先至冇乜人知。

咁今次聯盟背後發功係咪有用？佢話睇富貴黨嘅成績就知一二，例如富貴黨成功上演「山頂復仇記」，大幅拋離公文袋陳淑莊，佢認為唔止富貴黨有出力，因為佢都喺背後發功，叫咗好多老友投票，碌盡人情卡，逐票逐票打畀朋友拉番嚟先可以贏咁多。港島區其他中產區，佢話都有出力幫手拉票，只係大家唔知喎。佢仲話，佢連梁美芬都有幫手，叫晒黃埔區內嘅朋友支持佢。

至於聯盟幾時可以正式浮面參加選舉，Jeffrey話距離選委會選舉仲有成個月，大家都好忙，估計最快都要等下年至得。