引入外援爭不休 醫局庸人自擾之

999係緊急求助電話號碼，666係魔鬼撒旦嘅代號，咁777又係乜東東？咪係醫學界聯署阻撓港府引入外援醫生嘅人數囉。呢個數字極具象徵意義，即係話：本地薑唔理三七廿一，企硬拒納過江龍！

其實，公立醫院醫生短缺，已經唔係新聞咯，長期七個蓋冚十個樽，公共醫療體系遲早爆煲，當局梗係嗌晒救命啦。本來呢，搵外援打救不失為權宜之計，但好衰唔衰，弱勢政府百事哀，外援大計遇到醫生組織強力反對，雙方角力曠日持久，搞到家吓都未傾掂數。

嗱，醫學界尋日又喺城市論壇發炮嘞，質疑公院醫生過去十三年大增三成三，病人住院日數下跌一成四，醫護人員做到手忙腳亂根本係醫管局資源錯配造成，就算輸入多多外援都係無補於事咁話。醫生代表仲批評，當局引入海外醫生只為「填人頭」，掩飾管治失誤。

醫學界發炮，狂轟引入外援醫生計劃，可以講係好正常嘅反應。呢，早幾日之嘛，本地醫生組織已經喺大氣電波開火，話外援免試行醫係「醫療量化寬鬆」，重量不重質，勢必降低本港醫療質素喎。嗱嗱嗱，市民平日去公院睇病，醫生經常係咁意問兩句就收工，但係對影響自身利益嘅外援醫生計劃就喋喋不休，一直咁拗落去，公院醫護不足嘅痼疾拖到瓜柴都未得到醫治啦！

話時話，醫護荒問題搞到今時今日病入膏肓，禍源係當局短視功利、管治失誤，呢家嘢係人都知，都唔使醫生代表提醒咯。香港市民最關心嘅事情，係公立醫院嘅人手幾時可以回復正常狀態，你知啦，醫生護士忙中必然有錯，醫療事故層出不窮，真係死得人o架！

計太一叮話齋，引入海外醫生可解燃眉之急，原則上根本唔成問題，依家最大嘅問題係港府矯枉過正，政策前後不一，搞到政不通、人不和。唔係咩？港府一時嚴格到「連醫學院院長同大學教授都考唔到」，一時又話完全豁免考試，雙重標準製造矛盾，梗係出事啦。

開講有話，過猶不及，對海外醫生執業資格完全不考不問，對其他醫生唔公平。既然係咁，點解唔靈活變通，降低考試門檻呢？一句講晒，天下本無事，庸官自擾之，引入外援醫生受阻，完全係港府自作孽，與人無尤，叮！