SUN世代：為「老友記」傑青出錢出力

現今很多人都抱着「No Money No Talk」的心態，無錢收兼要自己扲錢的事，一定無人肯做，不過趙傑文（Calvin）卻例外。受爸爸影響，Calvin自小已參與社會服務，眼見一班長者被遺棄，令他甚為痛心。他不但成立香港防止虐待長者協會幫助這班「老友記」，還扲荷包為長者添置日用品。正因這份無私的奉獻，做到「問心無愧、回饋社會」，Calvin榮膺本年度十大傑出青年之一。

「我由細到大都鍾意做善事，我覺得呢個世界有好多人需要幫助，反正我有能力，點解我唔去幫呢？所以我會好落力，好用心去幫佢哋。」善心爆棚的Calvin，自小已喜歡做義工，原來是受爸爸的影響。他的爸爸熱愛行善，是日本文化協會會長，兒時已教他做人必須對社會有貢獻，令他從小養成服務社會的心。

決心助長者脫貧

在美國讀書時，Calvin經常做義工，探訪社會上的弱勢社群：「中學最後一年，我已經開始參加社會服務，成日探訪智障人士學校，讀大學時又加入咗學生會，為同學爭取權益。」○三年，他學成回港，正值沙士期間，長者生活更見艱苦，他有感香港醫療及退休保障都較外國落後，長者老來無依，決心要助長者脫貧：「香港係國際大都會，點解啲婆婆要執紙皮維生咁慘，我要為佢哋做啲嘢！」

○五年，Calvin與三位志同道合的好友成立香港防止虐待長者協會，幫助獨居及隱蔽長者。他指傳統的中國人，基於面子問題，很多人都愛「家醜不外傳」，即使「窮到燶」，也不會靠人，不少長者為了生計，寧願執紙皮，也不會做伸手派向政府申請綜援，故他除了定期探訪外，還扲荷包為長者添置日用品：「我會買啲米、棉被、油、罐頭等日常用品，放入個福袋度，送啲祝福畀佢哋！」

不過一次探訪，敲響了Calvin的心靈：「有次我去觀塘探一個婆婆，佢收到福袋都唔開心，一問之下原來佢畀個孫打，又畀新抱冷言對待，個仔又唔畀佢返屋企，婆婆只好喺公園坐，仲講到喊。」

爭取制訂《虐老法》

他認為，婆婆的個案只是冰山一角，鑑於本港沒有《虐老法》，為了防止長者繼續受到迫害，他誓要推動立法：「我好奇怪點解香港無《虐老法》，我希望可以訂番一條，如果我唔出嚟爭取，就永遠都唔會有！其實我哋都爭取咗好多年，仲入埋立法會家庭暴力委員會度爭取添！」致力服務「老友記」，最終為Calvin帶來傑青殊榮：「做到傑青真係好幸運，因為我唔係成功嘅教授，又無發明咗啲嘢流芳後世，我只係一個義工仔，本住自己嘅良心行事為社會服務。」本着「孝道之美，百行之本也」的座右銘，Calvin真的做到回饋社會，問心無愧。

Calvin's Profile

現職：匯能燈光有限公司銷售經理

學歷：美國印第安納大學巿場及國際商業系學士

公職：香港防止虐待長者協會創辦人兼會長

興趣：旅行、音樂、運動