政壇：徐嘉慎林鄭假破冰真暗戰

為咗抗議政府填海而舉辦嘅「愛護維港行」今年踏入第六年，主辦嘅保護海港協會首次請到昔日「死對頭」發展局局長林鄭月娥一齊行，曾經七次控告政府嘅保港會顧問徐嘉慎同佢行畢全程，有講有笑，呢次破冰之旅睇嚟好成功喎！

年年都有發信請林鄭參加，今年終於請得到佢大駕光臨，原來呢位局長唔單止好打得，仲好行得，由中環天星碼頭行到灣仔金紫荊廣場都面不改容，同保港會主席陸恭蕙同顧問徐嘉慎好好傾。

林鄭話今次嚟參加「遊行」其實係嚟接棒，因為政府對於建設維港已有好明確嘅目標，雖然以往同保港會有不同嘅睇法，連官司都打過，但好高興雙方可以攜手建設海港，佢又好謙咁話只係希望接一半棒，另一半監察嘅責任仍然要交番畀保港會做。佢唔單止身體力行，仲帶埋兩個手下，規劃署署長同土木工程拓展署署長嚟一齊行，以示佢嘅誠意。

約疑似特首候選人傾保港

政府畀足面，做咗十七年保港工作嘅徐嘉慎亦相當客氣，話好高興日後可以同政府繼續合作，佢雖然聲言會放低保港工作返英國教書，但仍然會保持警惕，仲話：「如果政府有啲咩動作，我哋仍然會出頭。」佢仲話為咗確保下屆政府會保持今屆一貫方針，下個禮拜會出信約見四位疑似特首候選人，佢笑言：「會要求佢哋作出承諾，我哋會公開畀市民知，以防佢哋反口。」

睇嚟保港會表面同政府握手言和，但實際上只係轉戰地下，咁即係話下屆政府都唔能夠鬆懈。