淫媒禍香江 餘孽成幫兇

唔知大家有冇留意，最近本港風化案零舍多，禁錮強姦有之，撞胸非禮有之，當街露械有之，無奇不有，無日無之。尤其係當街露械，短短個幾月就有十幾宗，而且遍布各區，觀塘、秀茂坪、銅鑼灣、香港仔……變態色魔梗有一個喺左近，問你怕未！

點解變態色魔愈來愈多？唔使問阿貴，淫賤黎居功至偉。佢嘅壹淫媒長期誨淫誨盜，污染社會，敗壞道德，本來已經搞到香港烏煙瘴氣，加上鹹濕免費報《爽報》獻世之後日日播淫，風化案有乜法子唔急增吖。正所謂，心理影響生理，喺淫媒嘅荼毒之下，色魔心理變態，生理自然亦跟住變態喇。嗱，《爽報》亂世短短個幾月，香港就發生十幾宗露械案，淫賤黎夠膽話唔關佢事？

《爽報》點樣宣淫販賤，睇吓呢幾個數字就知。至上月底為止，影視處共收到近二百宗關於該報含不雅、淫褻、暴力等內容嘅投訴，而該報被淫審處評定為第二類不雅物品嘅個案已累積到二十宗……唔係，廿一宗至啱，有篇本來被評為第一類非不雅嘅鹹濕文章，經影視處上訴之後，尋日被評為第二類不雅。試諗吓，一份推出個幾月嘅免費報，話咁快就有廿一次案底，係咪匪夷所思呢？淫賤黎能淫所不淫，唔只創下本港紀錄，睇怕全世界都冇人夠佢淫。

好彩呢個世界仲有樣嘢叫做正氣。《爽報》宣淫販賤，惹起社會公憤，學校抵制，屋邨抵制，婦女團體抵制，立法會議員梁美芬亦拍案而起，質疑當局敷衍了事，未能阻止淫賤刊物流出市面，令青少年受到荼毒，要求當局加快執法和檢控，同時採取更具阻嚇性嘅措施或懲罰。

梁議員就講得啱嘞，淫賤黎之所以淫所欲淫，將香港搞到烏煙瘴氣，皆因當局有法不依，執法不嚴，甚至枉法亂法，包庇淫媒。呢，壹淫媒過去百幾次違反《淫褻及不雅物品管制條例》，次次都被輕輕放過，罰款不過一萬幾千，全無阻嚇作用。淫賤黎食過翻尋味，《爽報》咪故技重施，賣弄色情催谷派發量囉，叮！

正如學者宋立功話齋，《爽報》嘅態度係「你有你罰，我有我出，你奈我唔何」，呢個亦係壹淫媒一貫策略。即係咁，港府放生淫媒，唔只危害社會兼侮辱女性，簡直好似鼓勵風化案，有錢就可以非禮吖嘛，非禮罰一萬，如果有一百萬，係咪可以非禮一百次先？

僧是愚氓猶可訓，妖為鬼蜮必成災。壹淫媒禍亂香港，固之然神憎鬼厭，而港府無能，包庇淫媒，更加罪無可恕。嗱，咪畀太一叮睇死吖喇，當局拖拖拉拉，對《爽報》嗰廿一宗第二類不雅個案遲遲未有行動，無非又想重施故技，拖拖吓就輕輕放過嘅啫，叮！