政壇：IT選委建制泛民混戰
建制派同泛民主派喺資訊科技界（IT界）一直勢均力敵，據聞嚟緊IT界選委戰，目前最少有五張名單參選，建制派會改頭換面以「ICT動力」名義聯票組名單參選，泛民主派則搵包括立法會前科技界議員單仲偕等組成接近二十人名單搶灘，另被指捲入「葛輝事件」嘅互聯網專業協會（iProA）會長鄧淑明則會以個人名義參選，尋求突圍而出。
幾張號稱獨立名單嘅實力亦不容忽視，好似鄧淑明計劃首度單人匹馬參選選委，有業界中人估計此舉旨在洗去親中形象，並為明年立法會選舉試票。據聞有「電訊魔童」稱號嘅王維基，再次披甲上陣競逐選委嘅機會都好高；另剛退出建仔嘅iProA總幹事趙鈺銘，亦密謀以「網民力量」名義組成三人名單參選。
