政壇：譚玉瑛寸爆替補機制
夕陽政府強推立法會替補機制，搞到二十二萬人上街怒吼，政府見勢色唔對即刻跪低，宣布押後表決同即時進行公眾諮詢。其實替補機制有幾唔公義真係路人皆見，連兒童節目主持人譚玉瑛姐姐都疑似睇唔過眼。
網上尋日流傳一段兒童節目短片，片中一開始就交代舊班長小慧因為搬家轉校，令班長之位空缺而要選出新班長，此時小璇同學即刻企起身話，自己上次以幾票之差輸咗畀小慧，依家小慧辭咗職，班長之位應由佢接替。正當小璇以為替補成功之際，譚玉瑛姐姐突然入咗班房，話要重新選過班長。於是有同學質疑點解唔係由上次第二高票嘅候選人替補呢？譚玉瑛姐姐即時曉以大義，話呢個做法唔係太好，因為每個同學喺每次選舉嘅想法都唔同，所以結果自然唔同，重選先係最公平喎！