未參選先吹水 大隻講得把嘴

天下本無事，小人自擾之。差啲引發官民大衝突嘅新界丁屋僭建風波，無端端又風起雲湧，始作俑者居然係口口聲聲以市民福祉為依歸嘅疑似特首候選人。

發展局局長林鄭月娥高調拒絕放寬丁屋高度限制，重申丁屋僭建問題仍會按「依法辦事、分類處理」既定策略處理，發現違規加到四、五、六層高就會取締。林鄭又話擴大丁屋發展會影響拓展其他土地嘅工作。

既然有法例又有政策，依法行事咪掂囉，何解要「重申」呢？原來係有人無事生非，添煩添亂。

話說兩位疑似特首候選人唐英年同梁振英，近排密鑼緊鼓四出拉票，為咗討好市民，佢哋當正自己係黃大仙，幾乎有求必應，有理冇理開出期票至算。呢，唐英年早幾日喺鄉議局吹水，話丁屋可以放寬高度限制，由三層增建至六層甚至九層喎。咁都得？當局同鄉議局已經有共識取締丁屋三層以上嘅僭建樓層，佢失驚無神「送」多幾層，豈不是同政府唱反調？咁擺明係討好民意呃選票啫，叮！

梁振英亦不甘示弱，話新界將來係珠三角嘅中心，建議成立基金平衡保育同業權人士利益。

名不正則言不順，唐唐連正式候選人都未係，已經亂噏廿四，開埋啲無法兌現嘅期票，除咗賣吓口乖敷衍民眾，博得幾下掌聲之外，一啲意義都冇，反而製造爭拗，加深矛盾，實在太不負責任。

好似公屋問題咁，CY梁話要將每年興建單位增至三萬五千個，唐英年就話要將輪候時間由三年縮短至兩年，仲話要興建年輕人單身宿舍添。點知畀運輸及房屋局局長鄭汝樺窒番轉頭，問土地從何而來？當堂瘀爆。

出得嚟行，預咗要還，如果疑似特首候選人好學唔學，學埋西方政客大搞福利主義、大派免費午餐嗰套，籠絡人心呃選票，到時兌現唔到咯喎，丟架事小，誠信破產事大吖。計太一叮話齋，如果亂開期票就可以成為特區阿一，唐唐不如承諾當選後每名市民送一層樓吖，笨！