SUN熱辣：豬耳下價菜咁都要造假

「用塑膠同化肥嚟做豬耳，真係匪夷所思！」全民健康動力主席勞永樂表示，塑膠有塑化劑成分，當中雌激素會刺激賀爾蒙，男士進食少量已可令精蟲大減，而化肥則含重金屬及微生物等污染物，「化肥係用嚟種植物，食咗都未必有大影響，但裏面有亞硝酸鹽成分就影響較大，會導致食物中毒及嘔吐大作。」

城市大學生物及化學系副教授林漢華表示，塑膠是工業原料，含有毒素及雜質。若以此製作豬耳，則需要加入大量催化劑及塑化劑等添加劑：「要塑膠變到好似豬耳咁軟，落嘅塑化劑就要愈多，而且呢啲添加劑係有毒素，食得多會被人體吸收，影響內分泌系統。明膠一般只用在化妝品上，較少用於食材上。」

名廚周中表示，豬耳口感煙韌爽脆，入口有豬肉味，煮熟後呈半透明狀，中間有一層白色的軟骨，不法商人以塑膠製作假豬耳，口感應有別於真豬耳，但他說：「豬耳係下價菜，都唔值錢，咁都有得造假，都無錢賺㗎喎！」豬耳多用作涼菜及頭盤，如滷味豬頭肉豬耳、上海菜式中的炒千層及炒豬耳等。