政壇：高達蛇竇做Gym上癮
立法會搬咗去添馬艦之後，被批評甩漏多兼大而無當，但都唔係毫無好處嘅，議員要休息或偷懶，呢度有一個好去處，講緊嘅就係立法會綜合大樓五樓嘅議員專用蛇竇。
新大樓喺五樓有一間小型健身室，房內放有兩張梳化、兩部電視、兩部跑步機同兩部健身單車，方便議員一邊運動、一邊留意會議進度。健身室旁邊仲設有浴室，即使做完運動身水身汗，都可以沖番個靚涼至去開會。
立法會議員「高達」李永達尋日着住皮鞋喺跑步機上示範跑步，話做運動令人頭腦清醒啲，所以愈做愈上癮。
李永達係區議會選舉葵青麗華選區候選人，同區參選嘅仲有陳志全同朱麗玲。
