政壇：煲呔曾稅留下手辣慶商家

煲呔曾領導嘅夕陽政府任期所剩無幾，但人未走茶已涼，真係可悲！

話說尋日佢出席商界聯席午餐會推介任內最後一份施政報告，會前有十幾名雷曼苦主到會場外贈興，展示一張有舊屎放喺煲呔曾頭頂嘅海報，寓意煲呔曾「將香港變臭港」；有示威者則狠批煲呔曾係垃圾同縮頭烏龜，既冇做好呢份工，又唔肯面對群眾接收請願信，總之人人喊打，最後佢哋同在場公關經過一輪交涉後至和平散去。

煲呔曾喺場內繼續辣火頭，呼籲商界支持制訂競爭法，期望草案可以喺佢任內通過。商界一直將競爭法炮轟得體無完膚，可能唔想聽佢再硬銷，未幾即有數十名商家未及答問環節結束就陸續先行離場。

逗留喺會場嘅商家就鍥而不捨追問煲呔曾當年開出下調利得稅嘅選舉期票，但佢繼續顧左右而言他，死撐上任後遇上金融海嘯，更卸責話欠商界百分之一嘅利得稅，或會同佢嘅繼任人講吓喎！咁無賴，難怪會後有商界中人狠批佢過橋抽板，既唔肯兌現競選承諾，又出口術要佢哋支持競爭法，絕對唔係一啖沙糖一啖屎，而係兩啖都係屎喎！