政壇：范太社聯論壇遇狙擊

疑似特首候選人CY梁振英同全國人大常委范徐麗泰，尋日喺八和會館就職禮上碰頭，兩人仲喺台上握手添，其中CY係八和會館嘅顧問。而另一疑似特首候選人唐唐尋日就冇出席公開活動。

喺去八和會館前，范太出席咗香港社會服務聯會主辦嘅社會發展論壇，呢個論壇大有來頭，之前CY同唐唐都分別出席過，兩位雖然都有受到在場與會人士質問，但總體氣氛尚算良好，但嚟自社區發展陣線嘅吳先生就對范太似乎唔太客氣，一開聲就質疑范太係以乜嘢身份出席，批評佢左諗右諗，仲話范太成日「猶抱琵琶半遮面」，咁樣真係唔係幾好，如果想參選的話，唔該落落大方認咗佢。

范太事後都話，明白成日左搖右擺會令人不滿，亦有可能令自己民望下跌，不過特首一職極為重要，希望大家畀多啲時間佢諗清楚，又話今年內相信可以公布決定，絕對唔會受中央影響決定。