政壇：白鴿黨凶兆總部現鴿屍

各大黨派正盡最後努力為區議會選舉拉票，但白鴿黨拉票之餘更呈凶兆。有讀者報料話三日前喺太子白鴿黨總部樓層對出冷氣機槽平台發現隻鴿屍，睇嚟只係死咗冇耐，都咪話唔邪門。除咗影響環境衞生外，相信班黨高層同該黨嘅區會候選人都會感到唔老利，莫非死鴿係預示白鴿黨選情凶多吉少？

話時話，雖然白鴿黨一直被視為泛民主派第一大黨，但近年聲勢已大不如前，仲不時爆出醜聞令黨丟架，好似立法會議員甘乃威被揭發涉嫌求愛不遂炒女助理事件，及至今年暑假期間，時任黨總幹事嘅陳家偉被本報獨家踢爆涉嫌到鳳樓尋歡，雖然佢事後堅稱只係「訪談」，但最後都係倉皇決定退黨。

再加上白鴿黨因去年支持二○一二政改方案，被人民力量日鬧夜鬧佢哋出賣民主，呢次區選有三十幾個區會選區畀人民力量狙擊，可謂面臨外憂內患。同甘乃威一樣參選中西區上環選區嘅，仲有人民力量嚴達明同無黨派陳賢豪。