政壇：邱騰華拒減核卸膊福島

人哋話夕陽無限好，但夕陽政府就唔係幾好，講緊嘅之唔係環境局局長邱騰華囉！民協立法會議員KK馮檢基尋日喺立法會提咗一條質詢，問邱騰華關於香港應對氣候變化策略及行動綱領嘅公眾諮詢，即係有關改變發電燃料組合嗰個。

喺呢次諮詢入面，邱騰華建議用多啲核能，尋日佢死撐核能嘅碳足印比煤低，但佢不得不承認，福島核事故後，有市民覺得要取締核能，當然亦有意見認為可以實事求是啲，確認咗核能安全性再算，所以結論就係睇國際社會，譬如國際能源組織點樣總結福島事故嘅經驗，然後先至再決定將來點做。

侮辱咗金紫荊星章

眼見邱騰華極速將個波推咗畀國際社會，KK就大鬧佢喺度自相矛盾，一方面話要睇國際社會點結論福島事故，同時又大讚核電夠低碳，言下之意即係唔肯減少用核能啫！跟住邱騰華辯駁確實係矛盾o架，所以咪要等國際社會總結咗經驗先囉！難怪社民連立法會議員「長毛」梁國雄都鬧今年獲頒金紫荊星章嘅邱騰華，「佢拎勳章o架嘛，都答成咁，侮辱咗個勳章呀！」

話時話，邱騰華上任以嚟沾手過唔少環保政策，可惜冇一樣有好結局。好似慳電膽券咁，就因為醜聞多多，加上資助市民買慳電膽嘅同時又要加電費，結果喺噓聲中無疾而終；傾咗勁耐嘅膠袋稅終於落實嘞，但商戶同消費者都罵聲四起；就連停車熄匙都要跪低讓步先至通過到。其實環保呢樣嘢，冇乜市民會反對，但係當局經常都可以搞到一團糟，好應該反省吓喇！