立會懶蛇出沒 政壇烏煙瘴氣

秋風起，三蛇肥，又係捉大懶蛇嘅時候！去邊度捉？梗係政壇蛇竇立法會啦，包你大有斬獲，滿載而歸！

嗱，有監察組織發表一年一度考勤報告，又有大批懶蛇議員原形畢露，被點名狠批少開會、少發言、少質詢、少動議、少投票，可謂「五少」，慘不忍睹。

議會懶蛇又大又肥，呢類「五少」蛇王充斥議事堂，無分男女，不分老幼。好似蛇王榜常勝將軍李國寶咁吖，被考勤報告踢爆，二十年來只提過一次修正案咁大把。人哋十年磨一劍，佢就廿年提一案，懶到出汁。仲有吖，佢上個立法年度不投票率居然高達八成七，再創新高，問你服未？而全年冇提出任何動議或修正案嘅議員，除李蛇王外，仲有四人，一齊遭到嚴厲譴責。

計太一叮話齋，對嗰啲「五少」議員，大家唔使客氣，齊聲譴責就啱嘞。議員受納稅人供養，開會投票係基本義務，咁都鬥偷懶、鬥蛇王，簡直不知所謂。

講起都幾可悲㗎，立法會最大黨唔係保皇黨，亦唔係反對黨，而係快閃黨，開會遲到早退，櫈都未坐暖就起身走人。民意代表嘅最大勢力唔係直選議員，唔係功能組別議員，而係啞議員，開會零發言，辯論無話兒，唔怪得立法會民望跌跌不休，屢創新低啦！

講開又講，議員質素每況愈下，點止偷懶蛇王咁簡單。佢哋一係唔開會，一開會就做政治騷，掟蕉、爆粗、掃枱，搞到議事堂烏煙瘴氣，亂七八糟，長此落去，想唔變垃圾會都幾難。即係咁，近排露體狂四出犯案，搞到神憎鬼厭，太一叮想提醒議員，你哋一係「三點不露」、一係玩蕉嚇人，咁嘅行徑同露體狂當眾露械冇乜分別，都係自暴其醜o架咋！

不過話時話吖，議會變大蛇竇，議事堂亂七八糟，議員其身不正固之然抵鬧，之但係港府一樣責無旁貸。唔係咩？港府弱勢無能，施政混亂，議員先至有可乘之機嘅啫，又唔見港英年代嘅立法局議員會咁放肆？

所以話啫，有點樣嘅政府，就有點樣嘅立法會。行政立法互相扯皮，高官議員蛇鼠一窩，大家累鬥累，衰鬥衰，何止立法會變垃圾會，簡直整個政壇都係垃圾崗添吖。咁啦，明年港府同立法會齊齊換屆，大多數市民冇得揀特首啫，但可以用手上嘅選票將懶蛇議員踢出立法會o架，叮！