政壇：卓永興放假拖住僱員復職權

上任成年咁耐嘅勞工處處長卓永興，同勞工界一直好疏離，見面溝通寥寥可數，更畀勞工界批評佢隱形。例如勞工界爭取多年嘅強制復職權，就因為佢愛理不理，搞到兩次上勞顧會都撻Q。可能佢都知衰，尋日就約齊勞顧會嘅勞資雙方代表食晏補鑊。

其實修訂《僱傭條例》畀權力勞資審裁處可以向僱主發出強制復職或再次聘用命令，唔遵從命令嘅僱主就要向被炒嘅打工仔支付多筆最高五萬元嘅額外款項，呢單嘢拖到今年，政府終於重提修訂建議，七月擺上勞顧會傾，但身為主席嘅卓永興竟然放大假，僱主趁機推翻建議話要再諮詢。到上個月再開會，資方代表之一嘅工業總會副主席劉展灝又要求勞工處再派員向啲理事解畫，結果又係未能通過。卓永興尋日終約齊勞資雙方討論議題，除劉展灝繼續表達工總唔同意外，其他資方都冇問題，呢單嘢咁就喺呢個非正式會議通過咗。其實卓永興上心啲嘅話，早啲蒲頭就唔使拖咁耐啦！