政壇：四叔減工作掀退休疑雲
「四叔」李兆基唔做恒地旗下一堆公司仔嘅董事，被傳到部署退休咁，恒地大公關Bonnie就呻，尋日係咁接傳媒電話查問，重複解釋澄清講到口水都乾埋，佢話四叔精神同身體都不知幾好，點會無端端退休？
Bonnie話恒地發展到咁大規模，旗下附屬公司大大小小過千間，如果四叔間間都坐住董事個位，簽名都簽到手軟呀，而且依家恒地成個集團都上晒軌道，所有附屬公司都可以自行營運，所以淨係架構最頂層嘅上市公司、控股公司同四叔私人投資旗艦兆基財經等，先至繼續做董事。
而部分在港嘅附屬公司董事，就由四叔細仔李家誠上陣。Bonnie話，四叔一早有講，家誠管香港、大仔家傑主攻內地。四叔辭任嘅三十三間附屬，當中二十七間由家誠任董事，另外六間就由四叔胞妹馮李煥琼，同恒地高層李鏡禹擔任。
四叔辭任嘅三十三間附屬公司，當中有二十七間由細仔家誠任董事。（資料圖片）