政壇：怪醫回巢醫局拒請

公立醫院人手荒搞到滿城風雨，好多醫學界「猛男」捱義氣回巢做兼職醫生幫手。正如立法會醫學界議員「怪醫」梁家騮近期同醫管局就海外醫生拗得面紅耳熱，尋日就大吐苦水，話自己八月初入紙申請做兼職，打算每周在專科門診工作兩天，仲發電郵拉攏醫生朋友一齊申請，點知等到上月底申請截止，到依家都冇回音，言語間帶有點無奈。

醫局覆兒歌醫生：多謝申請

腎科名醫何仲平都話，自己喺油麻地開私人診所十幾年，近水樓台向伊利沙伯醫院「叩門」，點知醫管局回覆令人啼笑皆非，話伊院腎科夠人用，不如轉去另一個山頭嘅屯門醫院幫手。何醫生話車程咁遠，想幫都愛莫能助。「兒歌醫生」陳以誠就話入紙申請後，醫管局回覆「多謝申請」後石沉大海。

聽起嚟，佢哋好似係畀醫管局摒於門外，但諗真啲，依家公院急需嘅係急症室同內科醫生，咁怪醫屬於外科，而「兒歌醫生」係兒科，好似冇咁大迫切性喎，似乎有啲摸錯門噃。

其實怪醫平日已經好忙，既要去立法會開會，又要處理中環新診所事宜；最近仲做埋人哋老公，太太有喜四個月，仲一索得男，明年三月分娩。依家佢晚晚要陪嬌妻刨育嬰指南，照顧一大一小，可謂忙上加忙，相信好難抽時間返去醫管局幫手。不過，梁太就話老公返去做兼職醫生都冇問題，自己有時都要飛去上海傾生意，自己照顧自己都得。

第一次做老竇嘅怪醫當然開心，仲話屋企有九個姪仔，有晒同小朋友玩嘅經驗，將來湊仔一定冇乜大問題，同埋有太太、外母幫手，自己可以唔使理咁多，最緊要專心賺錢養家。咁想唔想囝囝繼承衣鉢？佢話冇乜特別期望，一向都話天生天養，但依家最重要都係小朋友健健康康成長。