添馬艦開門揖盜 門常開雞犬不寧

唔怕生壞命，最怕改壞名。添馬艦新政府總部取名「門常開」，果然變咗無掩雞籠，向鼠竊狗偷大開方便之門。呢，尋日又爆失竊案嘞，數數手指，門常開今年內已經第六次失竊，政府總部淪為盜賊樂園，你話丟架唔丟架！

港府最熱衷搞面子工程，門常開可以話係其中表表者，為咗締造北大人南下揭幕嘅虛榮一刻，夾硬趕頭趕命提早喺八月入伙。不過，新政府總部嘅失竊問題並冇改善。

上星期三，外判公司職員將一批貨物放置喺新大樓停車場嘅臨時辦公室，以為堂堂港府，理應保安嚴密，萬無一失。哈，點知上周六點算時，發現一批價值十幾萬元嘅電腦軟件同記憶卡不翼而飛，三日來遍尋不獲，職員與上級商量後決定報警。

人哋話，港府靠得住，豬乸會上樹，太一叮以為港府施政朝令夕改，所以誠信破產啫，原來政府總部嘅保安一樣信唔過。政府總部係港府嘅象徵，竟然搞到成個無掩雞籠咁，保安漏洞百出，盜賊如入無人之境，講起都係笑話。嗱嗱嗱，今次就話承建商蒙受財物損失，萬一下次輪到邊位失魂高官被偷去機密政策文件，隨時影響公眾利益，咁就唔係講笑！

人賢招妒，人蠢招賊，新政府總部成為盜賊勝地已經係家常便飯。今年一月大樓工程如火如荼，已經有賊仔喺太歲頭上動土，潛入爆竊偷取銅線。鬼咩，新政府總部醜聞不斷，除咗迫令地盤工人開夜車趕工之外，就係出晒名保安粗疏，盜賊取易不取難，終於搞到雞犬不寧，高峰期連續四日遭匪徒偷竊，問你服未？

港府平日高高在上，與民隔絕，新政府總部對市民同記者「門常關」，但係對小偷就中門大開，長年累月開門揖盜。普天之下，咁荒謬嘅現象相信都係惟港府獨有咯！

即係咁，新政府總部取名所謂嘅門常開，本來寓意作風開明、聽取民意，最後冇樣做得到，反而益咗鼠竊狗偷，家無寧日。計太一叮話齋，名不正則言不順，不如拆招牌改名好過啦！