政壇:阿涂添丁暫停落區備戰
今年四十八歲嘅立法會議員涂謹申做咗議員好多年,咩風浪都見過,但尋日初為人父,佢話估唔到真係會咁緊張,前晚仲成晚瞓唔着。喺油尖旺奧運選區出選嘅佢話,呢三日會全天候陪住老婆,之後先再落區備戰,大條道理掛免戰牌。
涂太約定醫生剖腹產子,涂B尋日踏正中午一點半出世。太太阿Sue今次一索得男,為涂家繼後香燈,涂家上上下下都好興奮,阿涂話以為自己係最緊張嗰個,點知佢媽媽先係最緊張,成晚喺醫院騰出騰入,證明呢個嫲嫲好錫孫仔。
BB重六磅八安士,仲未改名,阿涂話名可以遲啲諗,反而最緊張個仔靚唔靚仔,佢話開頭以為BB係單眼皮,但後尾先睇到係雙眼皮,咁都放心啲。同樣喺油尖旺奧運區出選嘅仲有自由黨劉啟傑同人民力量朱景亮。
涂B面圓圓,似阿涂多啲。(涂謹申提供)