政壇：搞搞政：許照中教股民持盈保泰
呢排股市驟升驟跌，唔少股民喺股海迷航，唔知點算。尋日見到啱啱出資同六福集團等股東合設六福金融，仲出任主席兼行政總裁嘅Stephen許照中，當然要問下貼士喇，佢就贈咗四字真言畀大家。
Stephen縱橫股壇幾十年，係名副其實嘅老行尊，而機場管理局行政總裁許漢忠係佢細佬。Stephen話依家市況唔明朗，股民要謹記「持盈保泰」。若果股市反彈唔使開心住，回落都唔使咁難受，事關股市日日都開，最驚彈盡糧絕，人哋玩得盡興你卻冇份玩。形容得好貼切喎，口才一流，盡顯日日寫文章練出來嘅真功夫。
不過，佢笑稱自己口沒遮攔，唔似細佬咁文靜平時唔多講嘢，叫大家多啲關照佢喎！咁仲未夠，佢又話機場一定要起新跑道，事關香港要發展，唔可以乜都唔做。見佢一輪嘴頭撐細佬，就知佢哋兄弟情深喇！
