政壇：證監會新欄目刮料尋人

警方出尋人或通緝啟事就睇得多，估唔到證監會都用呢招，實行用人肉搜尋方法。

證監會尋日喺佢哋嘅網站推出新欄目，邀請公眾協助證監會尋找行蹤不明嘅人士助查。新欄目叫「你認識這些人士嗎？」 佢哋主要想搵兩類人士嘅資料，其一係遭法院下令逮捕嘅人士，其二係掌握咗某啲重要資料，相信能協助證監會進行調查的人士。

負責呢項工作嘅證監會法規執行部執行董事施衞民（Mark Steward）話，尋找同聯絡一啲掌握咗相關資料嘅人士，對證監會嘅調查工作好重要，希望公眾能提供線索。佢仲向公眾派定心丸，所有提供嘅資料將保密處理，仲會定期更新。一旦確定有關人士嘅行蹤，其資料將會從網站刪除。

首批「上榜」人士係：唐彥田，中盈控股（現為中盈國金資源控股）執行董事；潘彩虹，世大控股主席嘅顧問；梅曉東，持有證監會第4及第9類受規管活動牌照。三人嘅共通點係證監會相信佢哋身處內地。