政壇：范太網銷發展香港大計

全國人大常委范徐麗泰早前聘請公關公司為佢安排會見傳媒，尋日佢又自爆，話近日喺個人網頁內加設「香港情懷」部分，務求帶起社會對香港未來發展方向嘅討論。「香港情懷」裏有一句係咁嘅：「不論我將來有沒有機會服務香港市民……讓我們一起來，為建設美好家園而努力！」

佢話加添「香港情懷」，係要將自己對香港未來五年嘅發展想法上載至網頁，對於會否參選，佢未有正面回應，但當被問到建制派係咪能容下三位候選人時，佢就話若有人想參選「冇理由唔畀佢選」。

范太尋日出席講座，為在場約三百位老師概談人大常委會工作，有老師發問應否將六四加入國民教育課程，佢不諱言「國家好與唔好嘅地方都應該了解」，而六四是發生過的事實，故應納入課程。

其餘兩位疑似特首候選人唐英年同梁振英尋日無出席公開活動，表明挺梁嘅全國政協委員劉夢熊，尋日出席一個論壇時斬釘截鐵話，九月尾佢趁住去北京出席活動收風，得到嘅訊息係中央未有欽點邊個做下屆特首。唔單止咁，佢聲稱人大、政協系統中，唔少「重量級、有代表性、有鐵票」嘅人士，私下都支持佢挺梁嘅做法，只差在無公開表態，遲啲會喺選票上反映出嚟喎。