行政會議成員Laura查史美倫做過中港兩地證監會高層，係金融證券界女強人，綽號「查死你們」，佢早前就以冇時間為理由，辭任大學教育資助委員會主席，但就對金融界念念不忘，保留滙豐銀行亞太區副主席同香港交易所董事職位。
其實金融界好掛住佢，香港證券專業學會上周四就頒咗今年度榮譽會員資格畀佢，成為首位榜上有名嘅女性，將Laura喺金融界嘅資歷砌得更加完美。難怪佢幾忙都要抽空現身，接受大家對佢嘅讚美，仲講到明財經係佢嘅專業，學會頒授榮譽會員資格畀佢，對佢嘅意義特別重大喎！
查史美倫榮獲香港證券專業學會榮譽會員資格。
