政壇：選特首唔夠票鐵頭仁凍過水

特首選舉委員會喺下月中旬進行選舉，無論建制派或泛民主派都積極搶位，白鴿黨鐵頭仁早就表明想落場參選，當然要先攞到一百五十名選委提名，但睇嚟唔多樂觀嘞！

僅170人出戰選委

泛民早前話最少派出約二百人參加選委會選舉，希望可贏得一百五十個選委議席，以便提名泛民候選人參加明年的特首選舉，但係泛民尋日召開記者會，公布僅邀得約一百七十人參選，仲差三十人先達標。

佢哋公布選委會選舉初步參選部署，但多個傳統泛民主派界別，例如教育界、高教界同法律界等，雖然今屆呢啲界別嘅議席總數比上屆增加一半，但泛民初步參選人數僅與上屆一樣，冇增幅；資訊科技界上屆有二十人出選，但今屆目前只係搵到十五人，仲少啲添！負責呢個界別嘅公共專業聯盟副主席莫乃光話，有信心在報名死線前湊夠二十人參選喎！

泛民喺多個界別湊唔夠數，但喺社福界就出現超額參選嘅情況，由關愛基金執委會主席羅致光領軍嘅白鴿黨團隊、社福界立法會議員張國柱領軍嘅社總團隊同埋公文袋賴仁標團隊，合共派出七十五人角逐六十個議席，勢必分薄泛民票源令建制派得益。至於泛民一向最弱嘅工商界選委界別，今屆有望取得零的突破，曾參選○八年立法會總商會功能界別選舉嘅邵逸夫姪孫邵在德，可能會代表泛民參戰。

以前話二百人選到一百五十個都好抿水，依家湊唔夠數只得一百七十人，要贏到一百五十個位就更加難喇，簡直係凍過水。不過，已表明有意參加下屆特首選舉嘅鐵頭仁，仲死撐今次公布只係首批名單，有信心喺截止報名前可湊夠二百人參選喎！得唔得好快就知，等多個半月囉！