吹水難救經濟 行動先至實際

風水佬呃神騙鬼，往往扮到煞有介事，港府高官好學唔學，學埋呢啲伎倆，呢，財政司司長曾俊華就係佼佼者喇。

話口未完，鬍鬚曾又出嚟扮嘢。呢次巴閉囉， 噏完樓價噏物價，講完經濟講投資，口水多過茶，可惜講咗等於冇講。佢話喎，本港通脹未來幾個月仲會繼續升，但全年基本通脹略低於預測水平；又話歐美經濟環境惡劣，下行風險有增無減，香港好難獨善其身。

風水佬呃你十年八年，鬍鬚曾最叻現買現賣。咪睇佢扮晒魚蝦蟹，其實佢所講嘅全部係老生常談，了無新意，細路仔都知喇！

鬼唔知阿媽係女人咩。歐美經濟唔掂、各國會維持量化寬鬆政策、息口將持續低企、通脹陰影揮之不去，呢啲所謂嘅預測打開報紙乜都睇晒，仲使鬍鬚曾教？係人都知經濟前景惡劣，未來日子難捱，問題係，港府會點做呢？鬍鬚曾有乜妙計呢？廢話少講，行動最實際！

弊在噴完一輪口水，鬍鬚曾完全冇提出任何應付經濟衰退嘅措施，對扶貧紓困更加隻字不提。最離譜就係，佢居然摷啲過時數字嚟敷衍市民，話過去四年已經推出超過一千七百億元「利民紓困」措施喎。

咁都得？市民關心明年點算，你就大談前幾年「政績」，簡直九唔搭八。係咁，不如索性計埋港英時代嘅政績吖，笨！

透過鬍鬚曾嘅廢話，其實隱約聞到些少「怪味」。雖然佢講完通脹談經濟，但係就拒絕承諾來年預算案推出進一步紓困措施，反而重申要謹慎理財，唔通又玩「狼來了」，為預算案閂定水喉？

話時話，香港經濟前景的確令人擔憂，鬍鬚曾自己都講喇，九月份出口貨量估計將下跌超過一成，出口不振，香港梗係冇運行。仲有吖，通脹猛如虎，基層市民度日如年，其他唔講，泰國米受水災影響，估計加價一到兩成，問你點頂！

嗱，有人力資源機構警告，明年打工仔雖然普遍有人工加，但大部分仍然追唔上基本通脹。基層入不敷支，生活質素下降，夕陽政府依家仲印印腳，乜都唔做等收工，離唔離譜啲吖。咪話太一叮唔提醒，如果當局淨係識吹水，市民忍無可忍咯喎，佔領中環隨時變成佔領禮賓府都有之，叮！