政壇：唐唐網頁自爆唐太受傷害

疑似特首候選人唐唐嘅個人網頁尋日終於開通，放咗大批從未曝光嘅兒時照片同一家幾口嘅合照，明顯想晒溫情為自己嘅「感情缺失」補鑊。佢又喺網頁披露，小時候曾經拎住外公送畀佢嘅玩具槍，搵當時經常紮住馬尾嘅唐太做「白老鼠」，令到唐太痛得紮紮跳，但都冇因而討厭佢喎。希望唐唐唔會再令太太痛多次喇！

唐唐網頁設有留言功能，但就睇唔到其他人嘅留言，所以唔知道啲網民對佢彈多定讚多。而且網頁曝光冇耐，就疑似畀網民炸爆，多次間歇性癱瘓或反應遲鈍。

佢尋日出席教育工作者聯會活動後，被問及點解唔用番早前被傳媒踢爆嘅疑似競選網頁，佢自爆之前嗰個只係「概念」，變相證實該疑似網頁真係用嚟競選。問及會否就網頁申報選舉經費，佢重申仍在考慮是否參選，如果參選一定會按法例申報。佢喺會上又被教師問及就「感情缺失」有乜嘢同啲年輕人講，佢再次「人肉錄音機」上身，強調自己已向太太交代，依家冇補充。

另一名疑似候選人梁振英（CY）尋日去咗澳洲開會，夜晚一返港落機就去咗城大學生會搞嘅城大夜宴，並為自己差啲甩底道歉，在場學生則不斷高呼「特首！特首！」亞太台商聯合總會執行長胡卓君尋日同傳媒飯局時，就透露收過CY送贈嘅自家蔬菜、蘭花同蘿蔔等，仲大讚對方可愛。連無票投嘅台商都送嘢爭取支持，CY真係搏盡！

此外，新民黨主席葉劉淑儀亦重申有意加入戰團，會喺區議會選舉後諮詢黨員意見，之後仲會整番個參選諮詢委員會喎。