政壇：搞搞政：林鄭自讚搵煲呔曾墊底
立法會尋日繼續辯論施政報告致謝動議，各黨派議員繼續對煲呔曾禍港七年進行大清算，亦猛烈抨擊財爺鬍鬚曾同運輸及房屋局局長鄭汝樺縱容樓價狂升，變相益咗其他相對冇咁「罪孽深重」嘅高官，可以畀人鬧少啲，其中包括發展局局長林鄭月娥。
尋日林鄭喺立法會就致謝動議回應時，語有所指咁話「no news is good news（冇新聞就係好消息）」，指班議員呢兩日好少鬧佢，證明佢推動嘅政策有成效。對於富貴黨副主席方剛畀煲呔曾呢份最後施政報告五十四分，林鄭話希望方剛會畀佢高過五十四分，擺明係話自己做得好過煲呔曾啫！
林鄭又強調只要係好嘅政策，無論邊屆政府同邊個做局長都會延續落去。睇嚟佢無意留任下屆政府嘅傳聞，都有幾成真。
