東江之水加加加 開源節流快快快

水係生命之源，人類離唔開水，尤其香港食水資源貧乏，惟有依靠東江之水越山來，所以咯喎，東江水加價，就算港人點樣無奈，都只能夠接受。問題係，除咗接受東江水加價，唔通香港就冇其他辦法開源節流？辦法唔係冇嘅，關鍵係港府肯唔肯做嘢啫。

嗱，本港每年真金白銀向內地購買八億二千萬立方米東江水，但實際上根本唔需要用咁多水，即係話，好多食水白白浪費。正如立法會議員話齋，本港每年只需要六至七億立方米食水，買多咗嘅東江水往往流入大海，與其浪費食水及金錢，點解唔改以用量計算，減少買水。你估當局點講吖喇？發展局局長林鄭月娥話喎，就算本港改以用量購買東江水，食水成本亦未必會減少，目前嘅做法唔存在浪費公帑。

叮，簡直係狡辯！咁珍貴嘅食水白白流入大海，咁仲唔係浪費，點樣先至係浪費？講起浪費，水管嚴重老化，日爆夜爆，而水務署更換水管就大歎慢板，每年流走公帑數億元，咁唔止係浪費，直情係犯罪添吖！

話時話，減少買東江水唔單止係節省金錢嘅問題，更加係關乎環保、關乎道德嘅問題。眾所周知，地球水資源有限，好多人飲唔到乾淨食水，尤其係中國，人均水資源佔有量不足世界平均水平三分之一，全國幾百個城市供水不足，三億多人無法得到安全食水。喺咁嘅情況下，港府居然將大量寶貴嘅食水倒入大海，你話係咪折墮呀！

其實，事在人為嘅啫，供水合約由粵港雙方擬訂，價錢同供水量唔係冇得傾，問題係港府係咪有心去爭取。再講，開源節流辦法好多，海水化淡就係其中一個，可惜港府蝸行牛步，○五年已經進行海水化淡技術試驗，○六年展開諮詢，但拖到今年施政報告先至提出，而且仲要進行三年研究。唉，等當局研究得嚟，都唔知係乜嘢世界咯！

冇錯，海水化淡技術仲未完全成熟，目前成本係貴咗啲，但不可不知，科技發展日新月異，海水化淡成本必定會愈來愈平，如果港府依家仲唔着手研究，等到日後先至臨急抱佛腳，咁就後悔莫及嘅喇。仲有吖，大家都知內地一味發展經濟，忽視環保，搞到周圍烏煙瘴氣，唔少河流受到污染，東江水將來仲適唔適合飲用，冇人敢擔保o架。所以呢，求人不如求己，依家研究海水化淡係時候喇，嗱，千祈唔好臨渴先至掘井吖，叮！