政壇：立會大迷信要執主席位
立法會新大樓頭頭碰着黑，好似最近仲發生煲呔曾突然向人民力量黃毓民發爛渣事件，搞到主席誤判聲援毓民嘅社民連「長毛」梁國雄離場，主席為咗平息各方質疑，即時分批約泛民主派同建制派見面。據聞十多名建制派同主席見面時，其中保險界陳健波直覺主席辦公室擺位有啲唔妥，深感不妙，先後兩次主動建議主席執執個座位擺位。
自言唔識風水嘅健波話，主席座位應該靠住牆身、望向海，而非背住個海坐，如果按照風水基本原則嚟講，座位後面應該背後有啲靠山先至好，但當時不但冇靠山，而且仲要動土唔安寧，所以就提出不如執一執位，變成靠住道牆望住個海坐。多名建制派議員都認同健波嘅睇法，會計界陳茂波臨走前仲提醒主席，要聽聽健波嘅執位建議喎。
據講主席已喺尋日下午着職員搬過晒啲擺位，但新擺位係咪對以後有利，就要有待引證。