政壇：搞搞政：爆微絲血管 波波冇眼睇
盛傳會為疑似特首候選人助選嘅會計界立法會議員「波波」陳茂波，前排忽然眼紅，但佢唔係妒忌人哋嗰種「眼紅」，而係右眼爆微絲血管。直到尋日佢終於抽到時間去咗眼科醫生林順潮度診治，發現左眼生眼瘡，好彩都唔算係大問題，只要滴眼藥水就搞掂嘞！
其實波波都發覺唔能夠再長期望住電腦做嘢，望得耐要起身郁吓至得。話時話，原來佢近視都幾嚴重，兩隻眼都大約八百度，依家仲要有成一百度老花，冇咗個眼鏡肯定盲摸摸。
佢話本來諗過配兩款眼鏡，一款用嚟睇近嘢，另一副就用嚟睇遠嘢，可惜工作纏身，唔得閒配眼鏡，所以咪戴住副舊眼鏡先囉。其實佢咁忙，換眼鏡都唔係咁方便，可以考慮配一個漸進眼鏡，一副眼鏡睇遠近搞掂晒。
