政壇:派糖嗒落發霉 煲呔曾衰收尾

煲呔曾早前發表其任內最後一份施政報告,掟咗幾十億元派糖,無論房屋、交通、安老以至打工仔福利都有,咁樣慷納稅人之慨,擺明博攞尾彩。結果係點?咪又係衰收尾!

施政報告衰過舊年

港大民意研究計劃上周用電話抽樣訪問逾五百名市民,僅三成三對施政報告表示滿意,較報告發表後兩日進行嘅調查大跌十個百分點,三成二對報告表示不滿,較上次調查大升七個百分點。受訪者喺今年施政報告發表當日給予報告五十九點一分,較去年高零點二分,但經過一周討論後,市民對今年報告的最新評分跌至只有五十一點三分,較舊年同期低零點九分。

調查結果又發現,四成一受訪者不滿煲呔曾嘅施政方針,僅兩成九滿意;七成九認為煲呔曾提出嘅各種措施對解決貧富差距效用小,僅百分之七認為效用大;認為施政報告對穩定樓市同紓緩基層市民壓力效用小嘅,亦同樣超過五成。調查機構指施政報告嘅正面效應已迅速減退,煲呔曾政府重回弱勢政府困局。

呢份施政報告嘅評價同佢七年施政嘅評價一樣「高開低收」,而且跌勢仲急過舊年。咁即係話衰過以前喇!

點解派咁多糖都變成咁?梗係喇,佢喺施政報告提出嘅建議,例如新居屋計劃,詳情欠奉,只係話同入息掛鈎,定價仲係唔清唔楚,仲要幾年後先起得到;畀長者搭車搭船兩蚊優惠喎,但係話要拖到出年年底先有望實行;男性侍產假,又只係公務員先試行,一般打工仔唔知要等到幾時,呢啲全部都係發霉糖嚟,市民點會畀佢呃啃咗落去吖,(舌累)都(舌累)唔切喇!

「Money18免費即秒股票報價網站」現推出8升級功能,財經資訊,實時實發!

風信子