私家醫院無王管 醫療體系一鑊泡

本港醫療體系病到五顏六色，公立醫院醫療事故層出不窮就唔在講啦，諗唔到家陣連私家醫院都受到感染，爆出離奇醫療事故。

點離奇法呢？事情係咁嘅。浸會醫院月初為一位內地孕婦接生，生產過程順利，女嬰安全出世，呱呱落地。嗱，呱呱落地唔係比喻，個剛出生嘅女嬰真係跌落地！女嬰一出世就中頭獎，右前額一片瘀傷，真係我見猶憐。

大家或者會問，產房入面嘅醫生護士唔通盲嘅？定係全部瞓晒覺呀？咁大個BB女捐出來，點解都會接唔實？所以咪離奇囉！更離奇嘅係，初生嬰兒意外墮地咁牙煙，院方竟然冇按規定喺廿四小時內通報衞生署。院方話喎，女嬰並無嚴重受傷，強調冇刻意隱瞞。

嗱嗱嗱，你話係咪離奇呢？根據人類代代相傳嘅常識，BB仔身體極之脆弱，尤其頭部墮地後果可大可小，腦骨裂或腦出血固之然分分鐘搞出人命，就算表面無事，都要密切觀察，唔可以掉以輕心。浸會醫院憑乜嘢輕率斷定女嬰無事呢？唔通佢講你聽咩？

再講吖，就算女嬰福大命大，初步診斷並無嚴重受傷，院方如果負責任，係咪都應該以防萬一向當局呈報呀？其實，浸會醫院漏報醫療事故都唔係第一次o架喇，計太一叮話齋，私家醫院唔想搵食招牌受損，醫療事故梗係大事化小，小事化無喇，叮！

好嘞，私家醫院爆出醫療事故，食衞局局長周一嶽又點回應呢單嘢呢？離奇咯，佢一時話事件唔屬於嚴重醫療事故，一時又話女嬰需要更長時間觀察，一時又話個案特殊，院方應及早通報。真係語無倫次，九唔搭八，太一叮好懷疑佢係唔係細個時撼親個腦，所以搞到依家精神錯亂，神志不清。

其實呢，周一鑊對醫療事故不痛不癢、輕描淡寫，原因唔難理解，針唔拮到肉就唔知痛吖嘛！敢問周一嶽，如果個B係你閣下嘅，你仲會唔會若無其事？講到尾，醫療事故頻頻，就係個個唔攞個心出來做事！做官嘅敷衍塞責，搞私人醫療產業嘅見錢開眼！

唔好話太一叮唔提醒啲官老爺，人命關天，千祈唔好求求其其，以為遮遮掩掩就可過骨。公立醫院已經一塌糊塗，服務質素都好難有乜改進嘞，如果私家醫院唔增加透明度，當局又監管不力，呈報機制漏洞多多，咁香港醫療體系就真係死得喇！夕陽政府再吹水乜嘢醫療產業，全部都係嘥氣嘅咋，叮！