政壇：議員密謀推翻自閉位

立法會新大樓會議廳面積大咗幾倍，每名議員嘅座位連枱闊度有成五、六呎，原意係等班議員開會開得舒服啲，同埋可以一邊開會一邊做其他嘢，自成一國，好似諗得非常周到，但就搞到議員完全自閉。

經過施政報告發布會、特首答問大會同一次普通大會嘅實戰經驗之後，好多議員都抱怨新會議廳設計「大而無當」，其中最不滿係議員座位相隔太遠，好難即場交流意見同互通投票立場。例如答問大會當日，部分泛民主派議員因為無法即時通知分開咗幾排坐嘅盟友，最後集體離場變咗個別分批離場。

集體離席甩轆事小，將來搞到有人投錯票，意外否決咗某啲重要法案就事大。據聞多名議員曾密謀建議將全部座位同工作枱拆晒佢重新整過，但係又擔心會畀市民鬧爆佢哋浪費公帑。睇怕要等到有議員因為同黨友溝通不足而鬧錯人、掟錯嘢甚至投錯票，有關建議先可以提上枱討論。