政壇：搞搞政：救心火唔該攞籌

消防員救火救人要快，咁自己嘅心火又點救呢？有計嘅。消防處早前聘請女臨床心理學家趙思雅加入，據稱非常受消防鐵漢歡迎。消防處職工總會副主席謝守龍就講笑話，佢同主席都希望「排快籌」，見吓趙姑娘，事關佢哋爭取消防員四十八小時工時，非常大壓力咁話！謝守龍仲話，其實消防英雄也有背人垂淚嘅一刻，「我哋有淚水！但畀啲汗水遮住。」佢話試過好耐以前，救唔到人內心好難過，以前同事只可向上司呻吓，但依家多個人聆聽係好事，非常贊成。

趙思雅早喺八月到消防處總部返工，佢話以後同消防同事係「同聲同氣」，會更明白佢哋嘅工作性質同壓力來源，尤其係消防處工作面對生離死別，而消防員往往因工作而建立的英雄形象，令佢哋唔易表達自己情緒，但其實求助不代表軟弱，反而係積極面對困難，係勇敢嘅表現咁話。趙姑娘咁識講嘢，消防員未見佢都冧晒喇！