政壇：公文袋黨友玩模糊自救

港珠澳大橋上訴案告一段落，外傭居港權風波至今仍未平息，但已搞到公文袋七勞八傷，區選仲有兩個禮拜就殺到埋身，公文袋究竟失票幾多，到時先知。但已知嘅係一班公文袋區選候選人，近期都盡量淡化黨嘅形象，希望模糊化啲，務求減低外傭案嘅殺傷力。但最慘嘅地方係佢哋黨魁袋巾傑（梁家傑）唔多醒目，依然周街講外傭案單嘢，地區黨員想低調啲都唔得。

驚外傭案拖累選情

本來一班公文袋區議員近日出去派單張時，都冇同街坊提外傭單官司，只係密密提自己做過嘅政績，因為佢哋認為一般街坊都唔係好接受呢件事，與其同街坊講道理，不如宣傳吓自己幫班居民做過啲乜，佢哋可能仲受落。

但偏偏公文袋班大佬就唔係好為佢哋着想，好似尋日咁，公文袋就搞咗個「企硬」集會，出動全部黨高層，黨魁袋巾傑上台發言時，仲好HIGH咁自動波提到外傭案單官司，佢話覺得公文袋今次做得好啱，根本唔使講乜道歉。除咗袋巾傑外，另一名黨友仲犀利，話輸議席都唔緊要，但黨格唔可以輸，講到已經豁咗出去咁，其他大狀黨友發言時同樣HIGH爆，有人更加話，其實今次已經贏咗一班街坊信任同對手嘅抹黑，贏埋議席只係錦上添花。

雖然黨大佬唔覺有乜事，但一班地區黨友就驚到有得震冇得瞓，好幾位要選嘅黨友都好醒目，已經盡量喺海報同街板上「去公文袋化」，個logo有咁細得咁細，反而放大自己個名同政績，等市民眼光可以聚焦喺佢哋工作身上。佢哋好多都呻，唔係唔撐外傭，但聽得明嘅市民實在唔多，如果個黨仲不停煲爆外傭案，對佢哋選情未必有幫助。