免費教育歎慢板 渾渾噩噩到黃昏

夕陽政府最後一份施政報告喺教育方面幾乎交白卷，既冇願景，又冇承擔，搞到教育界人士怨聲載道。尋日就有教育團體發起遊行，要求港府解決多項教育問題，包括落實十五年免費教育、中學小班教學等。嗱，呢啲就叫做民意喇，唔係浮雲吖！

好心港府官僚醒啲喇，咪好似夢遊咁一日到晚唔係渾渾噩噩，就係一味吹水，乜嘢六大產業吖、教育樞紐吖，講到天花龍鳳，到頭來得個吹字。呢，隔籬埠澳門已開始推行十五年免費教育，而本港仲係無影無蹤，講起都失禮死人喇，叮！

好嘞，可能係知恥近乎勇啩，教育局局長孫明揚日前喺立法會議員追問下終表態，佢話喎，當局正研究推行十五年免費教育嘅可行性，又指依家推行緊嘅學券制同十五年免費教育支出差唔多，首先要解決幼稚園係咪改行統一收生同埋資助水平等問題。

其實事在人為嘅啫，如果當局有心推行十五年免費教育，所有問題統統唔係問題。好簡單，既然中學及小學可以推行免費教育，冇理由幼稚園做唔到o架。有人計過數，教育局上年度學前教育開支係廿五億元，如果推行十五年免費教育，全面資助幼稚園，估計每年經常開支只係增加六至十億元，對於肥到着唔到襪嘅港府嚟講，不過係九牛一毛，濕濕碎喇。

港府自己都識講，教育係最重要嘅長期投資，既然係咁，仲喺度猶豫乜嘢呢？老實講吖，每年使多幾億元就可以推行十五年免費教育，唔只惠及普羅大眾，仲可以百年樹人，有利香港長遠發展，咁嘅投資簡直係超值，點都好過港府周圍亂咁使錢喇。

總而言之，推行十五年免費教育有百利而無一害，其餘唔講，就以幼稚園教師嘅師資同薪酬嚟講，日後可望同中小學教師一樣與學歷掛鈎，咁可以吸引更多人才投身幼師行列，提升整體幼稚園教育水平，何樂而不為。仲有吖，推行十五年免費教育，可以乘機摺埋唔湯唔水嘅學券制，咁就唔使搞出咁多亂象喇。

免費教育歎慢板，渾渾噩噩到黃昏。咪話太一叮踢爆，港府對推行十五年免費教育拖拖拉拉，不情不願，真正原因唔係做唔到，而係玩卸膊。多做多錯、少做少錯、唔做唔錯吖嘛，呢班官僚唔只縮骨，而且懶惰，佢哋拖吓拖吓，好快夠鐘走人，咁就關人個關，叮！