CULTURE 噏：當巴士遇上fans

巴士不單是交通工具，更是不少80、90後的迷戀對象，近年本港湧現一批年輕巴士迷，他們除熟悉巴士資訊及收集巴士產品外，還經常流連路旁或巴士總站，為巴士拍snapshot，再上載與友人分享。城市大學人文社會科學院副院長黃成榮指出，年輕一代渴望為身邊事物留紀錄，加上關注社會變遷，令伴隨他們成長、型號不斷改變的巴士，成為紀錄對象。

今次找來80後巴士迷Anthony，訴說他與巴士之間的點滴。

Anthony：自細已經好鍾意巴士，可能因為細個時成日搭，返學放學又搭，同屋企人出街又搭，記載咗好多童年回憶，到大啲就開始收藏唔同嘅巴士產品，又會遊下巴士河。其實呢十幾年來，巴士嘅變化特別大，有巴士公司合併，好多新款巴士推出，但熱狗巴士又即將消失，我希望做個紀錄及見證新事物。

黃：新一代年輕人想有啲嘢可以掌握，所以有為身邊事物留紀錄嘅習慣，佢哋無辦法控制過去嘅事，但對於正在發生嘅事物，如屬於自己嘅成長歷史，就會想盡辦法紀錄、保存。

Anthony：依家我隨身都會帶住部數碼相機，喺街度見到特別嘅巴士款，就會即刻影低。有時仲會專登去佐敦渡華路個巴士總站，因為嗰度有最多、最齊嘅車款，可以話係「行到邊、影到邊」。我有一些巴士迷朋友，仲會拎埋腳架，喺路邊企成日影巴士。

黃：攝影器材普及咗，令大部分年輕人都可以擁有相機，方便影低身邊事物。不過，佢哋唔係咩都記低，而係選擇啲有特色嘅嘢，好似巴士咁，有好多年歷史，款式又多，亦係好多年輕人嘅成長回憶，所以特別受歡迎。

Anthony：自從巴士公司宣布會將全線巴士轉做空調巴士後，我就成日走去拍攝熱狗巴士。熱狗巴士係香港一個好重要嘅集體回憶，每次搭熱狗巴，我都會諗番起好多細個時嘅嘢，所以希望喺佢哋被淘汰前，影多啲唔同款嘅相片，作為日後回憶。

黃：80、90後愈來愈關心社會轉變，如對巴士嘅點滴變化，都「好有感覺」，而即將步進歷史嘅熱狗巴士，更成為追訪焦點。

Anthony：有啲巴士係樣辦，全球只得一部，好罕見。巴士迷見到架車，就會上載通知大家，我有時會將影到嘅巴士相片上載上網分享。

黃：透過網上分享一張巴士嘅靚相，或者提供一架特別型號巴士嘅消息，都會獲得同伴讚賞，令佢哋從中得到成就感。這些成就感，亦係推動佢哋繼續鍾愛巴士嘅原因。