美籍韓裔高球美女魏聖美（Michelle Wie）係高球圈寵兒，早前滙豐銀行同聯合國兒童基金會合辦咗個慈善高爾夫球賽，二十二歲嘅Michelle都有現身，當日經濟動力嘅立法會議員林健鋒（Jeffrey）都有落場打波，佢仲把握機會同Michelle合照添。
林健鋒睇完Michelle揮桿英姿，大讚對方好波，仲將佢同靚女影嘅合照當係寶咁放响iPad入面，喺立法會周圍騷畀人睇，見佢一邊晒靚相，一邊笑到見牙唔見眼，真係粉絲咁！
林健鋒（左）好雀躍同魏聖美（右）喺高球場上合照，事後仲周圍攞畀人睇。（林健鋒提供）
