政壇：煲呔曾林公公流出床照？

煲呔曾揀咗民望超低嘅「人肉錄音機」林瑞麟（林D9）做政務司司長，全城怒吼，但佢連日死撐林公公冷靜，處事能力高，聽到網民更加火，尋日社交網站facebook就流傳一幅疑似煲呔曾同林公公嘅床照，當然一望就知道係假o架啦，唔使問一定係網民創意洩憤之作，尤其係相中人嘅對白更令人噴飯。

呢幅合成照，煲呔曾同林公公喺床上肉帛相見，兩個人含情脈脈咁互望對方。其中煲呔曾面帶微笑，壓咗喺林公公身上、輕撫着對方塊面話：「我鍾意你EQ（情緒智商）高！」而林公公則向煲呔曾報以淺笑話：「我鍾意你戇Q高！」雖然呢張合成照有啲意識不良，但佢所表達嘅內容，又的的確確係表達實況。林公公處理替補機制激發二十二萬人喺七一上街，煲呔曾都仲要搵佢做政務司司長，然後死撐林公公謙虛同EQ高，難怪網民要改圖將佢哋兩個惡搞喇。