政壇：邱騰華搵區議員墊背

煲呔曾就快執包袱，但佢承諾嘅好多政策都落空，其中一樣離目標最遠嘅可算係環保，淨係香港嘅空氣質素同落實清新空氣指標都畀啲環保團體鬧到飛起，煲呔曾唔肯認衰，以拖字訣話會喺任期中落實，尋日環境局局長邱騰華更公然拉區議員落水，要參加下月區選嘅人討論吓喺地區減少一成巴士線嘅問題，呢個影響民生、巴士公司利益嘅棘手議題真係燙手山芋，分分鐘搞到參選人焦頭爛額，邱騰華咁樣搵人為環保政策墊背，真係損人未必利己！

議題惹火 擺明靠害

中大環境、能源及可持續發展研究所尋日舉行開幕儀式，邱騰華出席時被問到煲呔曾承諾喺任期內落實空氣質素指標時，佢大講政府近年做咗呢樣嗰樣，減低咗空氣中二氧化硫同懸浮粒子量，跟住又話要將本地嘅空氣質素指標貼近世衞標準，需要將依家嘅污染源減至最低，除咗巴士要更低排放外，仲要透過巴士路線重整而減少百分之十巴士線，協助減低空氣污染。

區議員或者參選人幫手做地區工作本來無可厚非，但邱騰華將原本應該由政府負責運輸同環境嘅兩大政策局，統領運輸署等部門做嘅工作，卸落去區議員度，將人拉落水就真係值得商榷。事關今屆區選競爭激烈、地區狙擊不停，邱騰華再揼啲惹火議題落去，啲參選人無時間做地區調查，答又唔係，唔答就更衰。

記得去年初全港巴士都做過一次減班次嘅工作，當時總共削減咗約一成巴士班次，即涉及千多架巴士，今次要削減一成巴士路線，估計市民同巴士公司方面都有唔少反對聲音，即使行咗呢一步，本港嘅空氣質素指標都墮後先進地區太多，要喺明年六月底前達到世衞嘅標準真係有啲癡人說夢，但邱騰華同煲呔曾依然講大話，呢啲唔係蒙騙市民又係乜嘢﹖