假保育掩耳盜鈴 永利街得番個殼

大家仲記得永利街嗎？一部懷舊電影《歲月神偷》令呢條充滿五、六十年代氣息嘅舊街逃過清拆命運。但好可惜，永利街嘅集體回憶冇被歲月偷走，卻被港府偷走！

事情係咁嘅，上環永利街總共有十二幢戰後唐樓，市建局承諾會原汁原味保留，只係將單位復修，以象徵式租金租畀學者居住，作活化保育研究據點。好嘞，復修工程接近尾聲，結果點呢？勁囉，復修變大裝修，單位內櫳面目全非，五、六十年代嘅花紋地磚換咗柚木地板，大門舊式趟閘變咗現代木門；廚房裝落地玻璃門，地台鋪戶外木地板，原有歷史痕迹被洗刷一空，你話係咪搞笑吖！

永利街之所以值得保留，皆因充滿港人集體回憶，一磚一木附有歷史價值。點知當局沉香當爛柴，全部砸爛當垃圾丟，再換晒新裝修，搞到不倫不類，唔湯唔水，仲點樣反映歷史特色？點樣保留港人集體回憶？戰後唐樓得番個殼，單位內櫳任拆唔嬲，永利街到底係被活化，定係被死化？

正如保育人士批評，永利街若要原汁原味保留，根本唔可以住人，港府亂搞一通，有破壞冇建設，簡直就係唔化！

永利街因《歲月神偷》而街知巷聞，太一叮亦諗起一個關於偷嘢嘅故事。話說有個人想偷隔籬屋個大鐘，但個鐘太大，要拆而搬之，又怕砸鐘巨響驚動鄰舍，於是用手掩住自己對耳仔，以為其他人一樣聽唔到。其實，港府就係故事中嘅賊仔，搞保育掩耳盜鈴，虛有其名，自欺欺人，叮！

講開又講，港府假保育嘅例子真係多不勝數，永利街面目全非，好多活化古蹟更加變成平民禁地。本來保留古蹟就係將歷史留存，供人緬懷，但係港府神神化化，唔少古蹟被活化後變身高檔酒店或者超豪食肆，一般市民望門興嘆，古蹟淪為權貴階層嘅私有古董，咁樣保育仲有乜意思？

一句講晒，笨官僚掩耳盜鈴，假保育整色整水。港府眼高手低，九唔搭八，沉香當爛柴，文物當垃圾，咁嘅保育政策名不副實，可以摺埋都得嘞，叮！