政壇：搞搞政：肥仔明落區 捱出網球手
白鴿黨嘅立法會議員「肥仔明」李華明今年唔參選區議會選舉，但咪以為佢就可以印印腳唔使做，原來佢經常會幫黨友助選，好似落區派單張同揮手呢啲基本動作，佢樣樣做齊。
尋日首次喺新大樓舉行政府同立法會午宴，在場眾多賓客一人手上一杯酒，但肥仔明好健康飲番茄汁。佢一見到記者就呻，近排朝朝七點落區派單張，一個鐘就火速派完二千五百張，正正因為派單張派得多，加上不時要同街坊揮手，結果左手出現「網球手」症狀，拎唔到重嘢不在話下，連按吓左手手臂都會覺得痛。
所謂病向淺中醫，佢見唔對路，即時搵針灸師醫治，但針灸唔能夠一次見效，必須要定期針吓，衰在區選臨近、立法會又復咗會，佢連定期接受施針嘅時間都冇，所以暫時只好聽天由命嘞！
（設計圖片及對白）