公僕先享侍產假 着數之門為己開

煲呔曾任內最後一份施政報告，臨別秋波先益自己友，將公僕「先天下之樂而樂」傳統發揮得淋漓盡致。肥水不流別人田，眾樂樂不如獨樂樂，問你服未！

人口老化，生育率偏低，煲呔曾話要鼓勵市民生多啲，等香港可以持續發展喎。有乜好橋？除咗提高子女免稅額，減輕父母負擔呢啲例牌菜，仲有一招撒手鐧，就係有薪侍產假嘞。

老婆生仔，老公「陪月」仲有人工攞添，係咪好盞呢？之不過咁，如果以為有着數，快快手生番個，咁就實撞板嘞。原因一字咁淺，如果你唔係姓「公」，着數冇你份。

煲呔曾建議向公務員提供有薪侍產假，明年首季就假期日數同形式展開諮詢。佢話唔少先進國家都設有薪侍產假，目的係要鼓勵生育，推動「家庭友善」喎。

冇錯，侍產假呢項德政已經唔係新生事物，現時全球有近五十個國家同地區，提供唔同形式嘅侍產假，平均大約係兩個星期。問題係，喺其他地方係全民性質嘅福利，只要符合資格就可以享受，惟有香港別具一格，好嘢留番公務員「先行先試」，咁擺明係大細超，好唔公平啫，叮！

唉，港府寧為子弟兵錦上添花，不為有需要市民雪中送炭，有福公僕先享，一向都係咁喇。呢，好似涉及打工仔嘅五天工作周咁，當局又係率先喺政府部門推行，益自己友最積極。至於點樣擴大到私營企業，到依家仲係關人個關。

講真，香港人工時長幾乎冠絕全球。有調查發現，港人每日平均工時長達十個半鐘，每周工時差不多七十四個鐘，比起國際勞工組織建議每周四十個鐘嘅理想工時，高出近八成半。當局從來冇積極推行最高工時，幫基層打工仔紓緩壓力，根本就係講一套做一套。

叮！好多私人機構打工仔仲係每周工作五天半或者六天，公僕快手快腳率先實施五天工作周。呢頭普通市民日日做到冇停手，生育大計一拖再拖，嗰頭公務員就話推行有薪侍產假。經濟低迷話驚影響士氣，唔肯同私人機構一齊減人工，一見有復甦迹象就急急腳為公僕加薪。官老爺眼中只有「天賦官權」，永冇蝕底，幾時對普羅市民一視同仁過吖？

添馬艦新政府總部大樓設計概念係「門常開，民常繫」，計太一叮話齋，煲呔曾政府係着數之門常為己開就真，叮！