政壇：林安妮任滙豐信貸主管
尋日滙豐環球資產管理委任咗Elizabeth林安妮做董事兼亞太區信貸分析主管，佢已經有十五年行業經驗，喺加入滙豐之前，曾經做過穆迪投資服務副總裁及高級信用評級主任。近排滙豐好多人事變動，走嘅都係膊頭有花之人，搞到高層出現「淨流出」，Elizabeth係靚女一名，呢個委任令公司加添唔少生氣。
老實講，滙豐早前話要裁減三千個職位，詳情最快都要下個月至知，員工心情可想而知，但近日佢哋有好消息公布，就係員工做義工嘅話，有薪假期會增加兩日，等員工行善時更開心。
據聞，公司為咗鼓勵員工參與義工活動，更改咗啲細節，員工一年可申請兩日有薪義工假期服務社區，服務對象以公司認可嘅社區志願團體為主，其他團體都得，但需同公司傾吓。
