政壇：搞搞政：林公公chok樣 勁擦煲呔曾

逾二千人上街怒吼要踢升至政務司司長嘅林公公落台後，佢尋日首次以司長身份到立法會聽取施政報告，唔知係咪知道自己民意極低，唔受議員歡迎，所以煲呔曾未到前，佢唔單止同多位建制派議員握手寒暄，仲走去同泛民議員吹水講笑，擺明扮親切，博議員好感啦！

林公公做局長時已經出晒名唔識同議員打交道，就好似強推替補機制，差啲整死建制派議員，所以同議員嘅關係絕對唔講得上好好。但佢做司長後，可能知衰，尋日就刻意洗底，成個大公關咁滿場飛。

唔單止咁，上次「踢走林瑞麟」大遊行舉行後，佢曾經講過話會虛心聆聽公眾意見，尋日的確有聆聽意見，但就唔係聽市民意見，而只係聽煲呔曾講。份施政報告極沉悶，搞到大多數局長同行會成員都瞌眼瞓，但林公公反而全程「chok樣」專心聽，無論煲呔曾同佢有冇眼神接觸，佢都不時點頭扮畀反應，簡直係交足戲。