政壇：富貴黨拒埋堆 工專聯散晒

日前都講過，由經濟動力、專業會議、富貴黨同立法會議員「IQ博士」黃宜弘組成嘅工商專業聯盟變成一盤散沙，各自各出嚟開記招回應施政報告，點知尋日出到嚟點止散沙呀，富貴黨三位議員同聯盟割席，自己出嚟為民發聲，喪鬧施政報告幫唔到中小企同中產人士。

聯盟尋日喺立法會新聞發布室1B開記招嘅時候，獨欠富貴黨三位議員，原來佢哋正喺另一間發布室1A講緊自己嘅意見。聯盟盛讚完施政報告之後影大合照，三位富貴黨議員繼續唔喺度。專業會議嘅劉秀成覺得唔係幾好，於是走出發布室，做醜人勸富貴黨主席Miriam劉健儀埋位影相。

快餐店醫肚成陌路人

不過，Miriam似乎唔係好想影，於是佢轉身問首次去新大樓嘅富貴黨副主席「莎姐」周梁淑怡意見，莎姐將個波踢番畀佢，佢惟有硬住頭皮拉埋方剛、張宇人入房，但係入到房嘅時候，經濟動力嘅劉皇發同IQ博士已經去如黃鶴。

事情去到呢度仲未完結，經濟動力嘅林健鋒、梁劉柔芬同梁君彥，開完記招後拉埋專業會議嘅石禮謙，一齊去立法會新大樓對面間快餐店醫肚，佢哋食到咁上下，參觀完新大樓嘅富貴黨榮譽主席田北俊，同埋黨友方剛又去咗同一間快餐店食嘢，但兩班人坐得好開，明顯大家唔係同路人。最慘嘅莫過於劉秀成，佢畀人賣甩後，一支公去到同一間快餐店買嘢食，諗嚟諗去卒之決定外賣拎走去第二度食算數。

正所謂勉強冇幸福，聯盟內唔同黨派間早有嫌隙，兼且意見同立場南轅北轍，再加上驚畀聯盟淹沒咗本身政黨嘅聲音，咁梗係顧咗自己檔攤先啦，所以話呢，夾硬拉埋一齊又點會長久吖！